
ಮರ್ಚೆಡ್ ಡೇಸ್ ಸುದ್ದಿ |ಗಂಗಾವತಿ.20/7/26
ಗಂಗಾವತಿ : ನಗರದ ಶ್ರೀನೀಲಕಂಠೇಶ್ವರ ವೃತ್ತದಲ್ಲಿರುವ ಶ್ರೀಕೃಷ್ಣ ವೆಜ್ ಹೋಟೆಲ್ನಲ್ಲಿ ಸಂಭವಿಸಿದ ಅನಿರೀಕ್ಷಿತ ಹೊಗೆಯಾಡುವಿಕೆ ಹಾಗೂ ಆತಂಕದ ವಾತಾವರಣಕ್ಕೆ ಅಡುಗೆ ಅನಿಲ (ಎಲ್ಪಿಜಿ ಸಿಲಿಂಡರ್) ಸಮರ್ಪಕವಾಗಿ ಪೂರೈಕೆಯಾಗದಿರುವುದೇ ಮೂಲ ಕಾರಣ ಎಂಬುದು ಈಗ ಸ್ಪಷ್ಟಗೊಂಡಿದೆ. ವಾಣಿಜ್ಯ ಸಿಲಿಂಡರ್ಗಳ ತೀವ್ರ ಅಭಾವ ಮತ್ತು ವಿತರಣೆಯಲ್ಲಿನ ವ್ಯತ್ಯಯದಿಂದಾಗಿ ನಗರದ ಅನೇಕ ಹೋಟೆಲ್ ಹಾಗೂ ಉಪಹಾರ ಗೃಹಗಳು ಅನಿವಾರ್ಯವಾಗಿ ಹಳೆಯ ಪದ್ಧತಿಯ ಕಟ್ಟಿಗೆ ಒಲೆಗಳನ್ನು ಅವಲಂಬಿಸುವಂತಾಗಿದ್ದು, ಇದು ಗಂಭೀರ ಸುರಕ್ಷತಾ ಸಮಸ್ಯೆಗಳಿಗೆ ದಾರಿ ಮಾಡಿಕೊಡುತ್ತಿದೆ.
ಸಿಲಿಂಡರ್ ಕೊರತೆಯಿಂದಾಗಿ ಹೋಟೆಲ್ ನಿರ್ವಹಣೆಗೆ ಪರದಾಡುತ್ತಿರುವ ಮಾಲೀಕರು, ಅಡುಗೆ ತಯಾರಿಸಲು ಕಟ್ಟಿಗೆ ಒಲೆಗಳ ಬಳಕೆಯನ್ನು ಅನಿವಾರ್ಯವಾಗಿ ಮತ್ತೆ ಆರಂಭಿಸಿದ್ದಾರೆ. ಹೀಗೆ ಬಳಸುವ ಕಟ್ಟಿಗೆ ಒಲೆಗಳ ಹೊಗೆಯು ಅಡುಗೆಯ ಎಣ್ಣೆಯ ಜಿಡ್ಡಿನೊಂದಿಗೆ ಸೇರಿಕೊಂಡು ಅಡುಗೆಮನೆಯ ಚಿಮ್ಮಣಿಗಳಲ್ಲಿ ದಪ್ಪಗಿನ ಪದಕೆಯಾಗಿ ಜಮಾವಣೆಗೊಳ್ಳುತ್ತಿದೆ. ಇದು ಒಲೆ ಹಚ್ಚುವ ಸಂದರ್ಭದಲ್ಲಿ ದೊಡ್ಡ ಮಟ್ಟದ ಅಪಾಯಕ್ಕೆ ಆಹ್ವಾನ ನೀಡುತ್ತಿದ್ದು, ಇಂಧನ ಅಥವಾ ಡೀಸೆಲ್ ಬಳಸಿ ಒಲೆ ಉರಿಸುವಾಗ ಏಕಾಏಕಿ ಬೆಂಕಿ ಭುಗಿಲೆದ್ದು ಚಿಮ್ಮಣಿಗೆ ಆವರಿಸಿಕೊಳ್ಳುವ ಅಪಾಯ ಎದುರಾಗಿದೆ.
ಈ ಹಿಂದಿನಂತೆ ವಾಣಿಜ್ಯ ಸಿಲಿಂಡರ್ಗಳ ಸರಾಗ ಮತ್ತು ನಿರಂತರ ಪೂರೈಕೆ ಸಿಕ್ಕಿದ್ದರೆ ಇಂತಹ ಹಳೆಯ ಪದ್ಧತಿಗಳಿಗೆ ಮೊರೆ ಹೋಗುವ ಪ್ರಮೇಯವೇ ಬರುತ್ತಿರಲಿಲ್ಲ. ಆದರೆ ಗ್ಯಾಸ್ ಏಜೆನ್ಸಿಗಳ ನಿರ್ಲಕ್ಷ್ಯ ಹಾಗೂ ವಿತರಣಾ ವ್ಯವಸ್ಥೆಯ ವೈಫಲ್ಯದಿಂದ ಹೋಟೆಲ್ ಉದ್ಯಮಿಗಳು ಪ್ರತಿ ದಿನವೂ ಪ್ರಾಣಾಪಾಯದ ನಡುವೆ ಕೆಲಸ ಮಾಡುವ ದುಸ್ಥಿತಿ ನಿರ್ಮಾಣವಾಗಿದೆ. ಸಿಲಿಂಡರ್ ಸಿಗದೆ ಕಷ್ಟಪಟ್ಟು ಒಲೆ ಹಚ್ಚಿದಾಗ ಉಂಟಾಗುವ ಸಣ್ಣ ಕಿಡಿಯೂ ಸಹ ಚಿಮ್ಮಣಿಯಲ್ಲಿರುವ ಎಣ್ಣೆಯ ಜಿಡ್ಡಿಗೆ ತಗುಲಿ ಕ್ಷಣಾರ್ಧದಲ್ಲಿ ಭೀಕರ ಸ್ವರೂಪ ಪಡೆದುಕೊಳ್ಳುತ್ತಿದೆ.
ಸೋಮವಾರ ಬೆಳಿಗ್ಗೆ ಇದೇ ಕಾರಣದಿಂದ ಶ್ರೀಕೃಷ್ಣ ವೆಜ್ ಹೋಟೆಲ್ನಲ್ಲಿ ಒಲೆಯಿಂದ ಹತ್ತಿಕೊಂಡ ಬೆಂಕಿ ಹಾಗೂ ದಪ್ಪಗಿನ ಹೊಗೆ ಹೋಟೆಲ್ ಹಾಗೂ ಮೇಲಿನ ಲಾಡ್ಜ್ ರೂಮ್ಗಳಿಗೆ ಆವರಿಸಿಕೊಂಡಿತು. ಹೋಟೆಲ್ ತುಂಬಾ ಕಪ್ಪು ಹೊಗೆ ತುಂಬಿಕೊಂಡಿದ್ದರಿಂದ ಆತಂಕಗೊಂಡ ಗ್ರಾಹಕರು ಮತ್ತು ಸಿಬ್ಬಂದಿ ಜೀವಭಯದಿಂದ ಹೊರಗೆ ಓಡಿಬಂದು ಪ್ರಾಣ ಉಳಿಸಿಕೊಳ್ಳಬೇಕಾಯಿತು. ಸಕಾಲದಲ್ಲಿ ಸ್ಥಳಕ್ಕೆ ಧಾವಿಸಿದ ಅಗ್ನಿಶಾಮಕ ದಳದ ಸಿಬ್ಬಂದಿ ಬೆಂಕಿಯನ್ನು ನಂದಿಸಿದ್ದರಿಂದ ದೊಡ್ಡ ಮಟ್ಟದ ಪ್ರಾಣಾಪಾಯ ಹಾಗೂ ಭಾರೀ ಅನಾಹುತ ತಪ್ಪಿದಂತಾಗಿದೆ.
ಸಂಬಂಧಪಟ್ಟ ಇಲಾಖೆಯ ಅಧಿಕಾರಿಗಳು ಮತ್ತು ಗ್ಯಾಸ್ ವಿತರಣಾ ಸಂಸ್ಥೆಗಳು ಇನ್ನು ಮುಂದೆಯಾದರೂ ಎಚ್ಚೆತ್ತುಕೊಂಡು ವಾಣಿಜ್ಯ ಬಳಕೆಯ ಸಿಲಿಂಡರ್ಗಳು ಹೋಟೆಲ್ಗಳಿಗೆ ಯಾವುದೇ ವ್ಯತ್ಯಯವಿಲ್ಲದೆ ಸಮರ್ಪಕವಾಗಿ ಪೂರೈಕೆಯಾಗುವಂತೆ ಕ್ರಮಕೈಗೊಳ್ಳಬೇಕು. ಜೊತೆಗೆ ಹೋಟೆಲ್ ಹಾಗೂ ಲಾಡ್ಜ್ಗಳ ಚಿಮ್ಮಣಿ ಮತ್ತು ಬಾಯ್ಲರ್ ಸುರಕ್ಷತೆಯ ಬಗ್ಗೆ ಕಟ್ಟುನಿಟ್ಟಿನ ತಪಾಸಣೆ ನಡೆಸಿ, ಅನಿಲ ಕೊರತೆಯಿಂದ ಉದ್ಯಮಿಗಳಿಗೆ ಹಾಗೂ ಸಾರ್ವಜನಿಕರಿಗೆ ಒದಗುತ್ತಿರುವ ಸಂಕಷ್ಟವನ್ನು ತಕ್ಷಣವೇ ನಿವಾರಿಸಬೇಕಿದೆ.