ಮರ್ಚೆಡ್ ಡೇಸ್ ಸುದ್ದಿ.
ಗಂಗಾವತಿ: ವಚನ ಶಾಸ್ತ್ರದ ಪಿತಾಮಹ ಫ.ಗು. ಹಳಕಟ್ಟಿ ಅವರ ಜನ್ಮದಿನದ ಅಂಗವಾಗಿ, ನಗರದ ಬೇತೆಲ್ ಸ್ವತಂತ್ರ ಪದವಿ ಪೂರ್ವ ಕಾಲೇಜು ಮತ್ತು ಎನ್ಎಸ್ಎಸ್ ಘಟಕದ ವತಿಯಿಂದ “ವಚನ ಸಾಹಿತ್ಯ ಸಂರಕ್ಷಣಾ ದಿನಾಚರಣೆ”ಯನ್ನು ಅತ್ಯಂತ ಸಡಗರ ಮತ್ತು ಅರ್ಥಪೂರ್ಣವಾಗಿ ಆಚರಿಸಲಾಯಿತು.
ವಿದ್ಯಾರ್ಥಿಗಳಲ್ಲಿ ವಚನ ಸಾಹಿತ್ಯದ ಜಾಗೃತಿ ಮೂಡಿಸಲು ಮತ್ತು ನೈತಿಕ ಮೌಲ್ಯಗಳನ್ನು ಬಿತ್ತುವ ಉದ್ದೇಶದಿಂದ ಹಮ್ಮಿಕೊಳ್ಳಲಾಗಿದ್ದ ‘ವಚನ ರಸಪ್ರಶ್ನೆ’ ಸ್ಪರ್ಧೆ ಕಾರ್ಯಕ್ರಮದ ವಿಶೇಷ ಆಕರ್ಷಣೆಯಾಗಿತ್ತು. ನೇರ ಪ್ರಶ್ನೋತ್ತರ, ಅಂಕಿತನಾಮಗಳ ಗುರುತಿಸುವಿಕೆ, ಶರಣರ ಭಾವಚಿತ್ರಗಳ ಪರಿಚಯ ಮತ್ತು ವಚನಗಳ ಜೋಡಣೆ ಸೇರಿದಂತೆ ಐದು ವಿವಿಧ ಸುತ್ತುಗಳಲ್ಲಿ ಸ್ಪರ್ಧೆ ನಡೆಯಿತು.
ಪ್ರಥಮ ಸ್ಥಾನ: “ಜ್ಞಾನ ನಿಧಿ” ತಂಡ
ದ್ವಿತೀಯ ಸ್ಥಾನ: “ಭಕ್ತಿ ಭಂಡಾರಿ” ತಂಡ
ತೃತೀಯ ಸ್ಥಾನ: “ವಿಶ್ವಗುರು” ತಂಡ
ವಿದ್ಯಾರ್ಥಿಗಳು ಬಸವಣ್ಣ, ಅಕ್ಕಮಹಾದೇವಿ ಹಾಗೂ ಅಲ್ಲಮಪ್ರಭುಗಳ ವಚನಗಳನ್ನು ಮನೋಜ್ಞವಾಗಿ ಪಠಿಸುವ ಮೂಲಕ ಸಭಿಕರ ಮನಗೆದ್ದರು.
ಕಾರ್ಯಕ್ರಮದಲ್ಲಿ ಮುಖ್ಯ ಅತಿಥಿಗಳಾಗಿ ಭಾಗವಹಿಸಿದ್ದ ನಿಜಲಿಂಗಪ್ಪ ಮೆಣಸಿಗಿ ಮಾತನಾಡಿ, “ವಚನ ಸಾಹಿತ್ಯ ಕೇವಲ ಪುಸ್ತಕಗಳಲ್ಲಿ ಉಳಿಯಬಾರದು, ಅದು ನಮ್ಮ ಜೀವನದ ದಾರಿದೀಪವಾಗಬೇಕು. ಸತ್ಯ ಮತ್ತು ನೈತಿಕತೆ ಮರೆಯಾಗುತ್ತಿರುವ ಇಂದಿನ ದಿನಗಳಲ್ಲಿ ವಚನಗಳ ಮೌಲ್ಯಗಳು ಅತ್ಯಗತ್ಯ,” ಎಂದು ಕಿವಿಮಾತು ಹೇಳಿದರು.
ರಾಷ್ಟ್ರೀಯ ಬಸವದಳದ ತಾಲೂಕಾ ಘಟಕದ ಗೌರವ ಅಧ್ಯಕ್ಷ ಕೆ. ಪಂಪಣ್ಣ ಮಾತನಾಡಿ, “ವಚನ ಸಾಹಿತ್ಯದಿಂದ ಆತ್ಮಬಲ ಹೆಚ್ಚುತ್ತದೆ. ನಾವು ವ್ಯಕ್ತಿಗಳ ಗುಲಾಮರಾಗುವುದನ್ನು ಬಿಟ್ಟು, ಅರಿವಿನ ಗುಲಾಮರಾಗಬೇಕು. ಶರಣರ ಆದರ್ಶಗಳನ್ನು ಮೈಗೂಡಿಸಿಕೊಳ್ಳುವುದು ನಿಜವಾದ ಪೂಜೆ,” ಎಂದು ಕರೆ ನೀಡಿದರು.
ಕಾರ್ಯಕ್ರಮದಲ್ಲಿ ಬಿ.ಸಿ.ಎಫ್.ಎ ಆಡಳಿತಾಧಿಕಾರಿ ಹೇಮಾ ಸುಧಾಕರ್, ಖಜಾಂಚಿ ಸುಜಾತ ರಾಜು, ಕಾಲೇಜಿನ ಪ್ರಾಚಾರ್ಯ ಬಸವರಾಜ್ ಕೆ., ಮಹಿಳಾ ಮಹಾವಿದ್ಯಾಲಯದ ಉಪಪ್ರಾಂಶುಪಾಲ ಹನುಮಂತಪ್ಪ, ಎನ್ಎಸ್ಎಸ್ ಅಧಿಕಾರಿಗಳು, ಬೋಧಕ-ಬೋಧಕೇತರ ಸಿಬ್ಬಂದಿ ಹಾಗೂ ವಿದ್ಯಾರ್ಥಿಗಳು ಉಪಸ್ಥಿತರಿದ್ದರು. ವಿಜೇತ ತಂಡಗಳಿಗೆ ಬಹುಮಾನ ವಿತರಿಸಿ ಗೌರವಿಸಲಾಯಿತು.