Home ಸುದ್ದಿ ನೆನೆಗುದಿಗೆ ಬಿದ್ದ ಕನಕಗಿರಿ ಉತ್ಸವ: ಇದು ಸರ್ಕಾರದ ನಿರಾಸಕ್ತಿಯೇ ಅಥವಾ ಹಣದ ದುರುಪಯೋಗವೇ?
ಸುದ್ದಿ

ನೆನೆಗುದಿಗೆ ಬಿದ್ದ ಕನಕಗಿರಿ ಉತ್ಸವ: ಇದು ಸರ್ಕಾರದ ನಿರಾಸಕ್ತಿಯೇ ಅಥವಾ ಹಣದ ದುರುಪಯೋಗವೇ?

Share
Share

 

ಮರ್ಚಡ್ ಡೇಸ್ ಸುದ್ಧಿ.

ಕನಕಗಿರಿ: ಜಿಲ್ಲಾಡಳಿತವು ಪ್ರತಿಷ್ಠಿತವಾಗಿ ಹಮ್ಮಿಕೊಳ್ಳಲು ಉದ್ದೇಶಿಸಿದ್ದ 5ನೇ ಕನಕಗಿರಿ ಉತ್ಸವವು ಸಾರ್ವಜನಿಕರ ಪಾಲಿಗೆ ಕೇವಲ ‘ಮರೀಚಿಕೆ’ಯಾಗಿ ಉಳಿದಿದೆ. ಪದೇ ಪದೇ ಉತ್ಸವದ ದಿನಾಂಕ ಮುಂದೂಡಲ್ಪಟ್ಟು, ಇದೀಗ ಸಂಪೂರ್ಣ ಸ್ಥಗಿತಗೊಂಡಿರುವುದು ಗಂಗಾವತಿ ಮತ್ತು ಕನಕಗಿರಿ ಭಾಗದ ಜನರಲ್ಲಿ ತೀವ್ರ ನಿರುತ್ಸಾಹ ಮೂಡಿಸಿದೆ.

ಪದೇ ಪದೇ ದಿನಾಂಕ ಬದಲಾವಣೆ: ಹಳಿ ತಪ್ಪಿದ ಸಿದ್ಧತೆ.

ಮೊದಲಿಗೆ ಮೇ 8 ಮತ್ತು 9 ರಂದು ಉತ್ಸವ ನಡೆಸಲು ನಿರ್ಧರಿಸಲಾಗಿತ್ತು. ಆದರೆ ಸ್ಥಳೀಯ ದುರ್ಗಾದೇವಿ ಜಾತ್ರೆಯ ಹಿನ್ನೆಲೆಯಲ್ಲಿ ದಿನಾಂಕವನ್ನು ಮೇ 16 ಹಾಗೂ 17ಕ್ಕೆ ಮುಂದೂಡಲಾಯಿತು. ಆ ಬಳಿಕ ಆಡಳಿತಾತ್ಮಕ ಕಾರಣಗಳನ್ನು ನೀಡಿ ಜೂನ್ 10ಕ್ಕೆ ನಿಗದಿಪಡಿಸಲಾಯಿತು. ಇದೀಗ ಕೊನೆಯ ಕ್ಷಣದಲ್ಲಿ ಜೂನ್ 10 ಹಾಗೂ 21ರ ಕಾರ್ಯಕ್ರಮಗಳೂ ರದ್ದಾಗಿದ್ದು, ಉತ್ಸವವನ್ನು ನವೆಂಬರ್ ತಿಂಗಳಿಗೆ ತಳ್ಳಲಾಗಿದೆ ಎಂಬ ಚರ್ಚೆಗಳು ಸಾರ್ವಜನಿಕ ವಲಯದಲ್ಲಿ ಕೇಳಿಬರುತ್ತಿವೆ. ಇನ್ನೆರಡು ದಿನ ಬಾಕಿ ಇರುವಾಗ ಜಿಲ್ಲಾಧಿಕಾರಿಗಳು ಏಕಾಏಕಿ ಉತ್ಸವ ಮುಂದೂಡಿರುವುದು ಜನರ ಆಕ್ರೋಶಕ್ಕೆ ಕಾರಣವಾಗಿದೆ.

ಸಿದ್ಧತೆಯ ಶೇ. 40ರಷ್ಟು ವೆಚ್ಚದ ಹಣ ನೀರುಪಾಲು

ಉತ್ಸವಕ್ಕಾಗಿ ಈಗಾಗಲೇ ಶೇ. 40 ರಷ್ಟು ಪೂರ್ವಸಿದ್ಧತೆಗಳು ಪೂರ್ಣಗೊಂಡಿದ್ದವು.

ಲಕ್ಷಾಂತರ ರೂಪಾಯಿ ನಷ್ಟ: ಗುತ್ತಿಗೆದಾರರು, ಉಪಗುತ್ತಿಗೆದಾರರು ಮತ್ತು ಕಾರ್ಮಿಕರ ಕೂಲಿ, ಸಾಮಗ್ರಿಗಳ ಸಾರಿಗೆ ವೆಚ್ಚ, ವಿದ್ಯುತ್ ಅಲಂಕಾರದ ಸಾಮಗ್ರಿಗಳು ಹಾಗೂ ಬೃಹತ್ ಊಟದ ಶೆಡ್ ನಿರ್ಮಾಣಕ್ಕೆ ಭಾರಿ ವೆಚ್ಚ ಮಾಡಲಾಗಿತ್ತು.

ದಿನಸಿ ದಾಸ್ತಾನು ವ್ಯರ್ಥ: ಸಾವಿರಾರು ಜನರಿಗೆ ಊಟದ ವ್ಯವಸ್ಥೆ ಕಲ್ಪಿಸಲು ತಂದಿದ್ದ ಕಿರಾಣಿ ಹಾಗೂ ನಾನಾ ದಿನಸಿ ಸಾಮಗ್ರಿಗಳು ಸಿದ್ಧತೆಯಲ್ಲಿದ್ದವು. ಸರ್ಕಾರದ ಈ ದಿಢೀರ್ ನಿರ್ಧಾರದಿಂದಾಗಿ ಗುತ್ತಿಗೆದಾರರು ಹಾಗೂ ಸಾರ್ವಜನಿಕರ ಹಣ ಅಪವ್ಯಯವಾದಂತಾಗಿದೆ.

ರಾಜ್ಯ ರಾಜಕೀಯದಲ್ಲಿ ಇತ್ತೀಚೆಗೆ ಮಹತ್ವದ ಬದಲಾವಣೆಗಳಾಗಿದ್ದು, ಡಿ.ಕೆ. ಶಿವಕುಮಾರ್ ಅವರು ಮುಖ್ಯಮಂತ್ರಿಯಾಗಿ ಅಧಿಕಾರ ವಹಿಸಿಕೊಂಡು 15 ದಿನಗಳೇ ಕಳೆದಿದ್ದರೂ, ಕನಕಗಿರಿ ಹಾಗೂ ಗಂಗಾವತಿಯಲ್ಲಿ ಇನ್ನೂ ಹಳೆಯ ಫ್ಲೆಕ್ಸ್ ಹಾಗೂ ಬ್ಯಾನರ್‌ಗಳೇ ರಾರಾಜಿಸುತ್ತಿವೆ. ಆ ಬ್ಯಾನರ್‌ಗಳಲ್ಲಿ ಸಿದ್ದರಾಮಯ್ಯ ಅವರ ಹೆಸರನ್ನು ಸಿಎಂ ಸ್ಥಾನದಲ್ಲಿ ಹಾಗೂ ಡಿ.ಕೆ. ಶಿವಕುಮಾರ್ ಹೆಸರನ್ನು ಡಿಸಿಎಂ ಸ್ಥಾನದಲ್ಲೇ ಉಳಿಸಿಕೊಳ್ಳಲಾಗಿದೆ. ಅಲ್ಲದೆ ಸಚಿವ ಸ್ಥಾನದಿಂದ ನಿರ್ಗಮಿಸಿರುವ ಸ್ಥಳೀಯ ಶಾಸಕ ಶಿವರಾಜ್ ತಂಗಡಗಿ ಅವರ ಹೆಸರೇ ಇನ್ನೂ ಕನ್ನಡ ಮತ್ತು ಸಂಸ್ಕೃತಿ ಸಚಿವರಾಗಿ ಬ್ಯಾನರ್‌ಗಳಲ್ಲಿದೆ. ಜಿಲ್ಲಾಡಳಿತದ ಈ ಬೇಜವಾಬ್ದಾರಿತನ ಸಾರ್ವಜನಿಕರ ತೀವ್ರ ಅಸಮಾಧಾನಕ್ಕೆ ಕಾರಣವಾಗಿದೆ.

“ಕನಕಗಿರಿ ಉತ್ಸವದ ಆಚರಣೆಗೆ ಬಿಡುಗಡೆಯಾದ ಅನುದಾನದಲ್ಲಿ ಭಾರಿ ಅವ್ಯವಹಾರ ನಡೆದ ವಾಸನೆ ಬಡಿಯುತ್ತಿದೆ. ಈ ಬಗ್ಗೆ ಉನ್ನತ ಮಟ್ಟದ ತನಿಖೆಯಾಗಬೇಕು. ಜೂನ್ 10 ಹಾಗೂ 21ಕ್ಕೆ ಮುಂದೂಡಿದ್ದ ಉತ್ಸವ ಏನಾಯಿತು ಎಂಬುದಕ್ಕೆ ಜಿಲ್ಲಾಧಿಕಾರಿಗಳಾಗಲಿ ಅಥವಾ ಸ್ಥಳೀಯ ಶಾಸಕರಾಗಲಿ ಯಾವುದೇ ಪ್ರತಿಕ್ರಿಯೆ ನೀಡದೆ ತುಟಿ ಬಿಚ್ಚದಿರುವುದು ಹಲವು ಅನುಮಾನಗಳಿಗೆ ದಾರಿ ಮಾಡಿಕೊಟ್ಟಿದೆ.”

            ಯಮನೂರಪ್ಪ ಮಲ್ಲಿಗೆವಾಡ (ಕೆ.ಜೆ.ಎಸ್.                           ಹೋರಾಟಗಾರರು)

ಒಟ್ಟಾರೆಯಾಗಿ, ಇತಿಹಾಸ ಪ್ರಸಿದ್ಧ ಕನಕಗಿರಿಯ 5ನೇ ಉತ್ಸವವು ಆಡಳಿತ ಯಂತ್ರ ಮತ್ತು ರಾಜಕೀಯ ನಾಯಕರ ಗೊಂದಲದ ಗೂಡಾಗಿ ಪರಿಣಮಿಸಿದ್ದು, ಜನಸಾಮಾನ್ಯರ ನಿರಾಶೆಗೆ ಕಾರಣವಾಗಿದೆ.

Share
Related Articles
ಅಂಕಣಸುದ್ದಿ

ಜನರ ಜೀವ ಉಳಿಸಲು ಜಾಗತಿಕ ಔಷಧಿ ದೈತ್ಯರ ಎದರು ಸೆಟೆದು ನಿಂತ ಧೀರ ಅಧಿಕಾರಿ ಐಎಎಸ್ ಅಧಿಕಾರಿ ಪಿ.ಎಚ್. ಕುರಿಯನ್.

ಮರ್ಚೆಡ್ ಡೇಸ್ | ವಿಶೇಷ ಲೇಖನ: ಅಧಿಕಾರವೆಂದರೆ ಜನರ ಸೇವೆ ಎಂಬುದನ್ನು ಜಗತ್ತಿಗೆ ತೋರಿಸಿದ ಅಪರೂಪದ...

ಸುದ್ದಿ

ಡ್ರೋನ್ ಕಣ್ಣಲ್ಲಿ ಸೆರೆಯಾಯ್ತು ದೇವಿರಮ್ಮ ಬೆಟ್ಟದ ಅದ್ಭುತ ವೈಭವ: ಜನಸಾಗರದ ನಡುವೆ ರಕ್ಷಣಾ ಪಡೆಯ ಶ್ಲಾಘನೀಯ ಸೇವ.

ಮರ್ಚೆಡ್ ಡೇಸ್ ಸುದ್ದಿ|ಚಿಕ್ಕಮಂಗಳೂರು. ಚಿಕ್ಕಮಗಳೂರು :ತಾಲೂಕಿನ ಮಲ್ಲೇನಹಳ್ಳಿ ಸಮೀಪದಲ್ಲಿರುವ ಸುಪ್ರಸಿದ್ಧ ದೇವಿರಮ್ಮ ಬೆಟ್ಟದಲ್ಲಿ ಭಕ್ತಿಭಾವದ ಪರಾಕಾಷ್ಠೆ...

ಸುದ್ದಿ

ಆಕಾಶದಲ್ಲೇ ಬೆಳಕಿನ ಮಹಾಸಂಗ್ರಾಮ! ಶತಮಾನಗಳ ಸಂಪ್ರದಾಯಕ್ಕೆ ಸಾಕ್ಷಿಯಾದ ಕೇರಳದ ತ್ರಿಶೂರ್ ಪೂರಂನ ‘ವೆಡಿಕ್ಕೆಟ್ಟು’ ವೈಭವ.

  ಮರ್ಚೆಡ್ ಡೇಸ್ ಸುದ್ದಿ| ವಿಶೇಷ ವರದಿ ಭಕ್ತಿ, ಸಂಪ್ರದಾಯ ಮತ್ತು ಪಟಾಕಿಗಳ ಅಬ್ಬರದ ಅಪರೂಪದ...

ಸುದ್ದಿ

ಹಾಲುಮತದ ಪುಣ್ಯಕಾಶಿ ಹುಲಜಂತಿಯಲ್ಲಿ ಕಲಿಯುಗದ ಪವಾಡ: ಮಾಳಿಂಗರಾಯನ ಶಿಖರಕ್ಕೆ ಶಿವ-ಪಾರ್ವತಿಯರಿಂದ ರೇಷ್ಮೆ ಮುಂಡಾಸು ಸೇವೆ.

ಮರ್ಚೆಡ್ ಡೇಸ್ ಸುದ್ದಿ|ಹುಲಿಜಂತಿ. ಹುಲಿಜಂತಿ:ಹಾಲುಮತದ ಶ್ರದ್ಧಾ ಕೇಂದ್ರ ಹುಲಜಂತಿ ಕ್ಷೇತ ಸಮಸ್ತ ಹಾಲುಮತ ಸಂಸ್ಕೃತಿಯ ಆರಾಧ್ಯ...