ವಿಶೇಷ ವರದಿ|ಮರ್ಚೆಡ್ ಡೇಸ್ (ಬಿಹಾರ್)
ಪ್ರೀತಿಗೆ ಭಾಷೆಯ ಹಂಗಿಲ್ಲ, ಗಡಿಗಳ ಬೇಲಿಯಿಲ್ಲ, ಅಂತಸ್ತು-ಶ್ರೀಮಂತಿಕೆಯ ಅಂತರವಂತೂ ಮೊದಲೇ ಇಲ್ಲ ಎಂಬುದನ್ನು ಮತ್ತೊಮ್ಮೆ ಜಗತ್ತಿಗೆ ಸಾರುವ ಅಪರೂಪದ ಪ್ರೇಮಕಥೆಯೊಂದು ಬೆಳಕಿಗೆ ಬಂದಿದೆ. ಸುದೂರದ ರಷ್ಯಾದಿಂದ ಭಾರತದ ಹಳ್ಳಿಯೊಂದರ ಮಣ್ಣಿನ ಗುಡಿಸಲಿಗೆ ಪ್ರೀತಿಯನ್ನು ಹುಡುಕಿಕೊಂಡು ಬಂದ ವಿದೇಶಿ ಯುವತಿಯೊಬ್ಬಳು, ನಿಜವಾದ ಪ್ರೀತಿಗೆ ಮನಸ್ಸೊಂದೇ ಸಾಕು ಎಂಬುದನ್ನು ಇಡೀ ಊರಿಗೆ ತೋರಿಸಿಕೊಟ್ಟಿದ್ದಾಳೆ. ಬಿಹಾರದ ಬಾಗಲ್ಪುರ ಜಿಲ್ಲೆಯ ರಾಜಾಪುರ ಗ್ರಾಮದಲ್ಲಿ ನಡೆದಿರುವ ಈ ಪ್ರೇಮ ಮಿಲನ ಈಗ ಇಡೀ ಭಾಗದಲ್ಲಿ ಭಾರೀ ಸಂಚಲನ ಮೂಡಿಸಿದೆ.
ಸಾಮಾನ್ಯ ಹಳ್ಳಿಯ ಹಿನ್ನೆಲೆಯ ಬಿಹಾರದ ಯುವಕ ರಾಹುಲ್ ಯಾದವ್, ಬದುಕಿನ ದಾರಿ ಹುಡುಕಿಕೊಂಡು, ನಾಲ್ಕು ಕಾಸು ಸಂಪಾದಿಸಿ ಕುಟುಂಬವನ್ನು ಸಲಹುವ ಕನಸು ಹೊತ್ತು ಸುದೂರದ ರಷ್ಯಾ ದೇಶಕ್ಕೆ ತೆರಳಿದ್ದನು. ಪರದೇಶದಲ್ಲಿ ಕೆಲಸ ಮಾಡುತ್ತಿದ್ದ ದಿನಗಳಲ್ಲಿ ಆತನಿಗೆ ರಷ್ಯಾದ ಸುಂದರಿ ಜೂಲಿ ಎಂಬ ಯುವತಿಯ ಪರಿಚಯವಾಯಿತು. ಪರಸ್ಪರ ಭಾಷೆ, ಸಂಸ್ಕೃತಿ, ಆಚಾರ-ವಿಚಾರಗಳು ಸಂಪೂರ್ಣ ವಿಭಿನ್ನವಾಗಿದ್ದರೂ ಇಬ್ಬರ ನಡುವೆ ಸ್ನೇಹದ ಚಿಗುರೊಡೆದು, ದಿನಗಳು ಕಳೆದಂತೆ ಅದು ಗಾಢ ಪ್ರೇಮವಾಗಿ ಮಾರ್ಪಟ್ಟಿತ್ತು.
ಉದ್ಯೋಗದ ಒಪ್ಪಂದ ಮುಗಿದ ಹಿನ್ನೆಲೆಯಲ್ಲಿ ಹಾಗೂ ವೈಯಕ್ತಿಕ ಕಾರಣಗಳಿಂದಾಗಿ ರಾಹುಲ್ ಯಾದವ್ ಕಳೆದ ಆರು ತಿಂಗಳ ಹಿಂದೆಯಷ್ಟೇ ರಷ್ಯಾದಿಂದ ತನ್ನ ತಾಯ್ನಾಡಿಗೆ ಮರಳಿದ್ದನು. ಪ್ರಿಯಕರ ಸಾವಿರಾರು ಮೈಲಿ ದೂರದ ಭಾರತಕ್ಕೆ ತೆರಳಿದರೂ ಜೂಲಿಯ ಮನಸ್ಸಿನಲ್ಲಿದ್ದ ಪ್ರೀತಿ ಕಿಂಚಿತ್ತೂ ಕಡಿಮೆಯಾಗಲಿಲ್ಲ. ಆತನ ಅಗಲಿಕೆಯನ್ನು ಭರಿಸಲಾಗದ ಜೂಲಿ, ರಾಹುಲ್ ಇಲ್ಲದ ಬದುಕು ಶೂನ್ಯವೆಂದು ಭಾವಿಸಿ, ಆತನನ್ನೇ ತನ್ನ ಬಾಳಸಂಗಾತಿಯನ್ನಾಗಿ ಮಾಡಿಕೊಳ್ಳಲು ದೃಢ ನಿರ್ಧಾರ ಕೈಗೊಂಡಳು.
ಕೇವಲ ಫೋನ್ ಮಾತುಕತೆಗೆ ಸೀಮಿತವಾಗದೆ, ತನ್ನ ಪ್ರೀತಿಯನ್ನು ದಡ ಸೇರಿಸಲು ಜೂಲಿ ಕೈಗೊಂಡ ನಿರ್ಧಾರ ಎಲ್ಲರನ್ನೂ ಬೆರಗುಗೊಳಿಸುವಂತಿತ್ತು. ಸ್ವತಃ ತನ್ನ ಹೆತ್ತವರು ಮತ್ತು ಕುಟುಂಬ ಸದಸ್ಯರನ್ನು ಒಪ್ಪಿಸಿದ ಆಕೆ, ಇಡೀ ಕುಟುಂಬ ಸಮೇತ ರಷ್ಯಾದಿಂದ ವಿಮಾನವೇರಿ ಭಾರತಕ್ಕೆ ಬಂದಿಳಿದಳು. ಅಲ್ಲಿಂದ ನೇರವಾಗಿ ಬಿಹಾರದ ಬಾಗಲ್ಪುರ ಜಿಲ್ಲೆಯ ಸಣ್ಣ ಹಳ್ಳಿಯಾದ ರಾಜಾಪುರಕ್ಕೆ ರಾಹುಲ್ನನ್ನು ಹುಡುಕಿಕೊಂಡು ಆತನ ಮನೆಗೇ ಬಂದು ನಿಂತಳು.
ವಿದೇಶದಿಂದ ಬಂದ ಕಾರು ತಮ್ಮ ಹಳ್ಳಿಯ ದಾರಿಯಲ್ಲಿ ಸಾಗಿ ರಾಹುಲ್ನ ಮನೆಯ ಮುಂದೆ ನಿಂತಾಗ ಗ್ರಾಮಸ್ಥರಿಗೆ ಗ್ರಾಮಸ್ಥರೇ ಅಚ್ಚರಿಪಟ್ಟರು. ಎದುರಿಗೆ ಕಂಡದ್ದು ಯಾವುದೇ ಐಷಾರಾಮಿ ಬಂಗಲೆಯಲ್ಲ; ಮಣ್ಣಿನ ಗೋಡೆಗಳು, ಒಣಗಿದ ಕಡ್ಡಿ-ಕಟ್ಟಿಗೆಗಳಿಂದ ನಿರ್ಮಿಸಿದ ಕಾಂಪೌಂಡ್ ಮತ್ತು ಮುರುಕಲು ಗುಡಿಸಲು ಮನೆ. ಆದರೆ, ಈ ಯಾವುದೇ ಬಡತನದ ಚಿತ್ರಣ ರಷ್ಯಾದ ಜೂಲಿಯ ಕಣ್ಣಿಗೆ ಅಡ್ಡಿಯಾಗಲಿಲ್ಲ. ಎದುರಿಗೆ ನಿಂತಿದ್ದ ಪ್ರಿಯಕರ ರಾಹುಲ್ನನ್ನು ಕಂಡಾಕ್ಷಣ ಓಡಿಹೋಗಿ ಆತನನ್ನು ಅಪ್ಪಿಕೊಂಡು ಕಣ್ಣೀರಿಟ್ಟಳು.
ಬಡತನ, ಅಂತಸ್ತು, ಭಾಷೆಯ ಹಂಗು ತೊರೆದು ತನ್ನ ಕುಟುಂಬದ ಎದುರೇ ಮಣ್ಣಿನ ಮನೆಯ ಪ್ರಿಯಕರನನ್ನು ಬಾಚಿ ತಬ್ಬಿಕೊಂಡ ಆಕೆಯ ಪ್ರೇಮಪರವಶತೆಯನ್ನು ಕಂಡು ಇಡೀ ಊರೇ ಮೂಕವಿಸ್ಮಿತವಾಯಿತು. ಸುಖ-ಭೋಗಗಳ ನಾಡಿನಿಂದ ಬಂದ ಜೂಲಿ, ರಾಹುಲ್ನ ಸರಳ ಜೀವನ ಮತ್ತು ಆತನ ಪ್ರಾಮಾಣಿಕ ಪ್ರೀತಿಗೆ ತಲೆಬಾಗಿದ್ದಳು. ಆಕೆಯ ಕುಟುಂಬದವರೂ ಕೂಡ ಹುಡುಗನ ಬಡತನವನ್ನು ಲೆಕ್ಕಿಸದೆ, ಆತನ ಸದ್ಗುಣ ಮತ್ತು ಮಗಳ ಮೇಲಿರುವ ನಿಷ್ಕಲ್ಮಶ ಪ್ರೀತಿಯನ್ನು ಕಂಡು ಮದುವೆ ಮಾತುಕತೆಗೆ ಸಂಪೂರ್ಣ ಸಮ್ಮತಿ ಸೂಚಿಸಿದರು.
ಜಗತ್ತು ಹಣ, ಅಂತಸ್ತು ಮತ್ತು ಆಡಂಬರದ ಹಿಂದೆ ಬೀಳುತ್ತಿರುವ ಈ ಆಧುನಿಕ ಕಾಲಘಟ್ಟದಲ್ಲಿ, ಸಪ್ತಸಾಗರಗಳನ್ನೇ ದಾಟಿ ಬಂದು ಮಣ್ಣಿನ ಗುಡಿಸಲಿನಲ್ಲಿ ಅರಳಿದ ಈ ಪ್ರೇಮಕಾವ್ಯ ನಿಜಕ್ಕೂ ಅದ್ಭುತ. ಪ್ರೀತಿಗೆ ಗಡಿಗಳಿಲ್ಲ, ರೂಪದ ಮೋಹವಿಲ್ಲ, ಕೇವಲ ಹೃದಯಗಳ ಮಿಡಿತವೇ ಮುಖ್ಯ ಎಂಬುದಕ್ಕೆ ಸಾಕ್ಷಿಯಾಗಿ ನಿಂತ ರಾಹುಲ್ ಮತ್ತು ಜೂಲಿಯ ಈ ಪ್ರೇಮಕತೆ, ಮಾನವೀಯ ಸಂಬಂಧಗಳ ಶ್ರೇಷ್ಠತೆಗೆ ಹಿಡಿದ ಕನ್ನಡಿಯಾಗಿದೆ.