ಮರ್ಚೆಡ್ ಡೇಸ್|ವಿಶೇಷ ವರದಿ.
ಬೆವರು ಸುರಿಸಿ ದುಡಿದ ಚಿಲ್ಲರೆ ಕಾಸಿಗೆ ದುಪ್ಪಟ್ಟು ಫಲ ಸಿಗುತ್ತದೆ, ಮುಂಬರುವ ಹೆಣ್ಣುಮಕ್ಕಳ ಮದುವೆಗೋ ಇಲ್ಲವೇ ವೃದ್ಧಾಪ್ಯದ ನೆಮ್ಮದಿಗೋ ಒಂದು ತುಂಡು ಭೂಮಿ ಸಿಗುತ್ತದೆಂಬ ನಂಬಿಕೆಯಿಂದ ಲಕ್ಷಾಂತರ ಜನಸಾಮಾನ್ಯರು ‘ಅಗ್ರಿಗೋಲ್ಡ್’ ಎಂಬ ಬೃಹತ್ ಸಾಮ್ರಾಜ್ಯದ ಬಲೆಗೆ ಬಿದ್ದರು. ಭಾರತದ ನಾನಾ ರಾಜ್ಯಗಳಲ್ಲಿ ಹಸಿರು-ಹೊನ್ನಿನ ಕನಸು ಬಿತ್ತಿದ ಸಂಸ್ಥೆ, ಜನರ ಪಾಲಿಗೆ ಮಾತ್ರ ಕೊನೆಗೆ ಉಳಿಸಿದ್ದು ಕಣ್ಣೀರಿನ ಕಡಲು. ಗ್ರಾಮೀಣ ಬಡವರು, ಕೂಲಿ ಕಾರ್ಮಿಕರು, ಮಧ್ಯಮ ವರ್ಗದವರು ತಮ್ಮ ಜೀವನದ ಸಮಗ್ರ ಉಳಿತಾಯವನ್ನು ಬಂಡವಾಳ ಹೂಡಿ ಕೊನೆಗೆ ಸಂಸ್ಥೆ ಕೈಯೆತ್ತಿದಾಗ ಬೀದಿಗೆ ಬಿದ್ದರು. ನಂಬಿಕೆಯೇ ಬಂಡವಾಳವಾಗಿದ್ದ ಠೇವಣಿದಾರರ ಆಕ್ರೋಶ ಒಂದೆಡೆಯಾದರೆ, ಇಡೀ ವ್ಯವಸ್ಥೆಯ ಮಧ್ಯೆ ಸಿಲುಕಿ ಅರೆದುಹೋದದ್ದು ಅದೇ ಹಳ್ಳಿಗಳ ಮುಗ್ಧ ಏಜೆಂಟರು.
ಅಗ್ರಿಗೋಲ್ಡ್ ಸಂಸ್ಥೆಯಲ್ಲಿದ್ದ ಬಹುತೇಕ ಏಜೆಂಟರು ಯಾವುದೇ ತರಬೇತಿ ಪಡೆದ ಕಾರ್ಪೊರೇಟ್ ಅಧಿಕಾರಿಗಳಲ್ಲ; ಬದಲಿಗೆ ಅದೇ ಹಳ್ಳಿಯ ಚಿರಪರಿಚಿತರು, ನೆರೆಹೊರೆಯವರು, ಬಂಧು-ಮಿತ್ರರು. ಸಂಸ್ಥೆ ನೀಡುತ್ತಿದ್ದ ಆಕರ್ಷಕ ಬ್ರೋಷರ್ಗಳು ಮತ್ತು ಜಮೀನಿನ ಆಸೆ ನೋಡಿ, ಅನ್ನದ ದಾರಿಗೆ ಇದುವೇ ಶಾಶ್ವತ ಕಾಯಕವೆಂದು ನಂಬಿ ಹಗಲಿರುಳು ಅಲೆದಾಡಿದರು. ತಮ್ಮ ಹೊಟ್ಟೆಪಾಡಿಗಾಗಿ ಸಂಸ್ಥೆಯ ಪರವಾಗಿ ಮಾತನಾಡುತ್ತಾ, ‘ನಮ್ಮ ಊರಿನವರೇ ಅಲ್ವಾ’ ಎಂದು ಜನ ಇವರ ಮುಖ ನೋಡಿಯೇ ಕೋಟ್ಯಂತರ ರೂಪಾಯಿ ಸುರಿದಿದ್ದರು. ಆದರೆ, ಸಂಸ್ಥೆ ದಿವಾಳಿಯ ನಾಟಕವಾಡಿ ಬಾಗಿಲು ಮುಚ್ಚಿದ ಆ ಕರಾಳ ದಿನ, ಕಂಪನಿಯ ಮಾಲೀಕರು ಎಲ್ಲೋ ಸುರಕ್ಷಿತ ನೆಲೆ ಕಂಡುಕೊಂಡರೆ, ಸ್ಥಳೀಯವಾಗಿ ಜನರ ಕಣ್ಣಿಗೆ ಬಿದ್ದದ್ದು ಮಾತ್ರ ಇದೇ ಏಜೆಂಟರು
ಸಂಸ್ಥೆ ಕೈಯೆತ್ತಿದ ಮರುಕ್ಷಣವೇ ನಂಬಿಕೆ ಕ್ರೌರ್ಯವಾಗಿ ಬದಲಾಯಿತು. ಬೆಳಗಾದರೆ ಏಜೆಂಟರ ಮನೆ ಮುಂದೆ ಜನ ಜಮಾಯಿಸಿ ಆಕ್ರೋಶ ಹೊರಹಾಕಲಾರಂಭಿಸಿದರು. ಸಾರ್ವಜನಿಕವಾಗಿ ಚಪ್ಪಲಿ, ಕೈಗಳಿಂದ ಹೊಡೆಸಿಕೊಂಡ ಏಜೆಂಟರು, ಹಳ್ಳಿಯ ಪಂಚಾಯಿತಿ ಕಟ್ಟೆಗಳಲ್ಲಿ ಅಪರಾಧಿಗಳಂತೆ ತಲೆತಗ್ಗಿಸಿ ನಿಲ್ಲಬೇಕಾಯಿತು. ಹೆಂಡತಿ-ಮಕ್ಕಳ ಮುಂದೆಯೇ ಎಳೆದಾಡಿ, ಅವಾಚ್ಯ ಶಬ್ದಗಳಿಂದ ನಿಂದಿಸಲಾಯಿತು. ಹಲವೆಡೆ ಸಾರ್ವಜನಿಕರ ಆಕ್ರೋಶಕ್ಕೆ ಅಂಜಿ, ತಮ್ಮ ಸ್ವಂತ ಮನೆ, ಹೊಲ-ಗದ್ದೆಗಳನ್ನು ಮಾರಿ ಜನರ ಅಸಲು ಹಣವನ್ನು ತೀರಿಸಿದ ನಿದರ್ಶನಗಳಿವೆ. ಬದುಕಿನ ಮಾನ-ಮರ್ಯಾದೆಗೆ ಅಂಜಿ, ಈ ಸಾಮಾಜಿಕ ಬಹಿಷ್ಕಾರ ಹಾಗೂ ಹಿಂಸೆಯನ್ನು ತಾಳಲಾರದೆ ಹಲವು ಏಜೆಂಟರು ನೇಣಿಗೆ ಶರಣಾಗಿ ಜೀವವನ್ನೇ ಬಲಿಕೊಟ್ಟರು.
ಅಗ್ರಿಗೋಲ್ಡ್ನಲ್ಲಿ ಹೂಡಿಕೆ ಮಾಡಿಸಿದ್ದು ಮಾತ್ರವಲ್ಲದೆ, ಕಂಪನಿಯ ಮಾತುಗಳನ್ನು ಅತಿಯಾಗಿ ನಂಬಿದ ಎಷ್ಟೋ ಏಜೆಂಟರು ತಮ್ಮ ಸ್ವಂತ ಜಮೀನು ಮಾರಿ ಬಂದ ಹಣವನ್ನೂ, ಕುಟುಂಬದ ಉಳಿತಾಯವನ್ನೂ ಇದೇ ಸಂಸ್ಥೆಯಲ್ಲಿ ಠೇವಣಿಯಾಗಿ ಇಟ್ಟಿದ್ದರು. ಇವತ್ತು ಅವರು ಕೇವಲ ಜನರ ನಿಂದನೆಗೆ ಗುರಿಯಾದ ಮಧ್ಯವರ್ತಿಗಳಷ್ಟೇ ಅಲ್ಲ, ಸ್ವತಃ ಸರ್ವಸ್ವವನ್ನೂ ಕಳೆದುಕೊಂಡ ಭಿಕ್ಷುಕರಾಗಿದ್ದಾರೆ. ಇತ್ತ ಕುಟುಂಬದಲ್ಲಿ ನೆಮ್ಮದಿಯಿಲ್ಲ, ಅತ್ತ ಸಮಾಜದಲ್ಲಿ ಗೌರವವಿಲ್ಲ; ಗಂಡ-ಹೆಂಡತಿ ದೂರವಾಗಿ, ಮಕ್ಕಳು ಶಾಲೆ ಬಿಟ್ಟು ಅನಾಥರಾದ ದುರಂತ ಕಥೆಗಳು ಪ್ರತಿಯೊಂದು ತಾಲೂಕಿನಲ್ಲೂ ಇವೆ. ಇಂದು ಇವರೆಲ್ಲರೂ ಉಸಿರಾಡುತ್ತಿದ್ದರೂ ಜೀವಂತ ಶವಗಳಂತೆ ಬದುಕುತ್ತಿದ್ದಾರೆ.
ವರ್ಷಗಳ ಕಾಲ ಕಾನೂನು ಹೋರಾಟ ಮತ್ತು ಕಣ್ಣೀರಿನ ಕಾಯುವಿಕೆಯ ನಂತರ, ಕರ್ನಾಟಕದಾದ್ಯಂತ ಬಾಕಿ ಇರುವ ಹೂಡಿಕೆದಾರರ ದಾಖಲೆಗಳ ಪರಿಶೀಲನೆಗೆ ಕೊನೆಗೂ 9 ಪ್ರಮುಖ ಕೇಂದ್ರಗಳು ನಿಗದಿಯಾಗಿವೆ. ಕಲ್ಯಾಣ ಕರ್ನಾಟಕ ಭಾಗದ ರಾಯಚೂರು, ಬಳ್ಳಾರಿ, ಕೊಪ್ಪಳ, ಕಲಬುರಗಿ, ವಿಜಯನಗರ, ಬೀದರ್ ಹಾಗೂ ಯಾದಗಿರಿ ಜಿಲ್ಲೆಗಳ ಸಂತ್ರಸ್ತರಿಗೆ ಅನುಕೂಲವಾಗುವಂತೆ ರಾಯಚೂರಿನ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿಗಳ (SP) ಕಚೇರಿಯನ್ನು ಪ್ರಮುಖ ಕೇಂದ್ರವನ್ನಾಗಿ ನೇಮಿಸಲಾಗಿದೆ. ನವೆಂಬರ್ 11 ರಿಂದ ನವೆಂಬರ್ 18 ರವರೆಗೆ (ಭಾನುವಾರ ಹೊರತುಪಡಿಸಿ) ಬೆಳಗ್ಗೆ 10:00 ರಿಂದ ಸಂಜೆ 5:00 ರವರೆಗೆ ಈ ಕೇಂದ್ರದಲ್ಲಿ ದಾಖಲೆ ಪರಿಶೀಲನಾ ಕಾರ್ಯ ಜರುಗಲಿದ್ದು, ಕಳೆದುಕೊಂಡ ಹಣ ಮರಳಿ ಸಿಗಬಹುದೆಂಬ ಕೊನೆಯ ಆಸೆಯ ಕಿರಣ ಮೂಡಿದೆ.
ಪರಿಶೀಲನೆಗೆ ಹಾಜರಾಗುವ ಹೂಡಿಕೆದಾರರು ಮೂಲ ಬಾಂಡ್ ಸರ್ಟಿಫಿಕೇಟ್ ಹಾಗೂ ಅಸಲಿ ಪಾವತಿ ರಶೀದಿಯನ್ನು ಅಧಿಕಾರಿಗಳ ವೀಕ್ಷಣೆಗೆ ಮಾತ್ರ ತೋರಿಸಬೇಕು (ಮೂಲ ದಾಖಲೆಗಳನ್ನು ಕೇಂದ್ರದಲ್ಲಿ ಬಿಡುವಂತಿಲ್ಲ). ಇದರೊಂದಿಗೆ ಆ ದಾಖಲೆಗಳ ಮೇಲೆ ಸಹಿ ಮಾಡಿದ ಬಣ್ಣದ ಜೆರಾಕ್ಸ್ ಪ್ರತಿಗಳು, ಆಧಾರ್ ಕಾರ್ಡ್, ಪ್ಯಾನ್ ಕಾರ್ಡ್ ಕಡ್ಡಾಯ. ಹಣ ನೇರವಾಗಿ ಖಾತೆಗೆ ಜಮೆಯಾಗಬೇಕಿರುವುದರಿಂದ ಬ್ಯಾಂಕ್ ಪಾಸ್ಬುಕ್ನ ಮುಖಪುಟದ ಪ್ರತಿ, ಇತ್ತೀಚಿನ ಪಾಸ್ಪೋರ್ಟ್ ಅಳತೆಯ ಫೋಟೋ ಮತ್ತು ಮೊಬೈಲ್ ಸಂಖ್ಯೆಯನ್ನು ಒದಗಿಸಬೇಕು. ಒಂದು ವೇಳೆ ಮೂಲ ಹೂಡಿಕೆದಾರರು ಮೃತಪಟ್ಟಿದ್ದರೆ, ಕಾನೂನುಬದ್ಧ ವಾರಸುದಾರರು ಮರಣ ಪ್ರಮಾಣಪತ್ರ, ವಾರಸುದಾರರ ದಾಖಲೆಗಳನ್ನು ಸಲ್ಲಿಸಿ ಅಧಿಕೃತ ಸ್ವೀಕೃತಿ ರಶೀದಿಯನ್ನು ತಪ್ಪದೇ ಪಡೆದುಕೊಳ್ಳಬೇಕಿದೆ.
ಸರ್ಕಾರ ಮತ್ತು ನ್ಯಾಯಾಲಯಗಳು ಠೇವಣಿದಾರರಿಗೆ ಹಣ ಮರಳಿಸುವ ನಿಟ್ಟಿನಲ್ಲಿ ಹೆಜ್ಜೆ ಇಟ್ಟಿರುವುದು ಸ್ವಾಗತಾರ್ಹವೇ ಸರಿ. ಆದರೆ, ಈ ಇಡೀ ಜಾಲದಲ್ಲಿ ಕೇವಲ ಒಂದು ಕಡೆಯ ಕಣ್ಣೀರನ್ನಷ್ಟೇ ಒರೆಸಿದರೆ ನ್ಯಾಯ ಪೂರ್ಣಗೊಳ್ಳುವುದಿಲ್ಲ. ಸಂಸ್ಥೆಯನ್ನು ನಂಬಿ ವರ್ಷಗಟ್ಟಲೆ ಬೆವರು ಸುರಿಸಿ, ಇಂದು ಸಮಾಜದಲ್ಲಿ ಎಲ್ಲವನ್ನೂ ಕಳೆದುಕೊಂಡು ಬೀದಿಗೆ ಬಿದ್ದಿರುವ ಮುಗ್ಧ ಏಜೆಂಟರ ಸಂಕಷ್ಟಕ್ಕೂ ಪರಿಹಾರ ಸಿಗಬೇಕಿದೆ. ಇಂತಹ ನಕಲಿ ಬಂಡವಾಳ ಹೂಡಿಕೆ ಜಾಲಗಳು ಮತ್ತೆ ತಲೆಯೆತ್ತದಂತೆ ಕಠಿಣ ನಿಯಮಗಳನ್ನು ರೂಪಿಸುವುದರ ಜೊತೆಗೆ, ಬಲಿಪಶುಗಳಾದ ಸಣ್ಣಪುಟ್ಟ ಏಜೆಂಟರಿಗೂ ಸಾಮಾಜಿಕ ನ್ಯಾಯ ಹಾಗೂ ರಕ್ಷಣೆ ಒದಗಿಸಿದಾಗ ಮಾತ್ರ ಇಂತಹ ಮಹಾ ಹಗರಣಗಳಿಗೆ ನಿಜವಾದ ತಾರ್ಕಿಕ ಅಂತ್ಯ ಸಿಗಲು ಸಾಧ್ಯ.