
ಮರ್ಚೆಡ್ ಡೇಸ್ ಸುದ್ದಿ.
ಹೊಸಪೇಟೆ: ಕಾನೂನು ಸುವ್ಯವಸ್ಥೆ ಕಾಪಾಡುವಲ್ಲಿ ಹಗಲಿರುಳು ಶ್ರಮಿಸಿ, ಪೊಲೀಸ್ ಇಲಾಖೆಯಲ್ಲಿ 33 ವರ್ಷಗಳ ಸುದೀರ್ಘ ಹಾಗೂ ನಿಷ್ಕಳಂಕ ಸೇವೆ ಸಲ್ಲಿಸಿದ ಹೊಸಪೇಟೆ ಟೌನ್ ಪೊಲೀಸ್ ಠಾಣೆಯ ಎಎಸ್ಐ ಕೆ. ಕರಿವೀರಪ್ಪ ಅವರು ಇಂದು ಸೇವೆಯಿಂದ ನಿವೃತ್ತಿ ಹೊಂದಿದರು.
ನಗರದ ರೋಟರಿ ಕ್ಲಬ್ ಸಭಾಂಗಣದಲ್ಲಿ ಆಯೋಜಿಸಿದ್ದ ಬೀಳ್ಕೊಡುಗೆ ಹಾಗೂ ಸನ್ಮಾನ ಸಮಾರಂಭದಲ್ಲಿ ಪಾಲ್ಗೊಂಡಿದ್ದ ವಿಜಯನಗರ ಡಿವೈಎಸ್ಪಿ ಮುರಳಿಧರ್ ಅವರು ಮಾತನಾಡಿ, “ಕಾನ್ಸ್ಟೇಬಲ್ನಿಂದ ಎಎಸ್ಐ ಹುದ್ದೆಯವರೆಗೆ ಕರಿವೀರಪ್ಪ ಅವರ ಸೇವಾ ಪಯಣ ಅತ್ಯಂತ ಪ್ರಶಂಸನೀಯ. ಅವರ ದೈಹಿಕ ಸದೃಢತೆ ಇಲಾಖೆಯ ಇತರೆ ಸಿಬ್ಬಂದಿಗಳಿಗೆ ಮಾದರಿಯಾಗಿದೆ” ಎಂದು ಬಣ್ಣಿಸಿದರು.
ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ಡಿವೈಎಸ್ಪಿ ಮುರಳಿಧರ್ ಅವರು, ಕರಿವೀರಪ್ಪ ಅವರ ಬದ್ಧತೆಯನ್ನು ಶ್ಲಾಘಿಸಿದರು. ಸಮಾರಂಭದಲ್ಲಿ ಮಾತನಾಡಿದ ಟೌನ್ ಪೊಲೀಸ್ ಠಾಣೆಯ ಇನ್ಸ್ಪೆಕ್ಟರ್ ಫೈಜುಲ್ಲಾ, “ಕರಿವೀರಪ್ಪ ಅವರು ಕೇವಲ ಕರ್ತವ್ಯನಿಷ್ಠ ಅಧಿಕಾರಿಯಲ್ಲ, ಅವರು ಅತ್ಯುತ್ತಮ ಕಬಡ್ಡಿ ಆಟಗಾರರೂ ಹೌದು. ಇಲಾಖೆಗೆ ಹಲವು ಪ್ರಶಸ್ತಿಗಳನ್ನು ತಂದುಕೊಟ್ಟ ಕೀರ್ತಿ ಅವರಿಗೆ ಸಲ್ಲುತ್ತದೆ. ಇಂದಿಗೂ ಅವರು ನವ ಯುವಕರಂತೆ ಉತ್ಸಾಹದಿಂದ ಇರುವುದು ಅವರ ಶಿಸ್ತುಬದ್ಧ ಜೀವನಕ್ಕೆ ಸಾಕ್ಷಿ” ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.
ಸಮಾರಂಭದಲ್ಲಿ ಪಾಲ್ಗೊಂಡಿದ್ದ ಗಂಗಾವತಿಯ ರಾಮುಲು ಕಾಲೇಜಿನ ಹಳೆ ವಿದ್ಯಾರ್ಥಿಗಳ ಪರವಾಗಿ ಮಾತನಾಡಿದ ನಬಿ ಸಾಬ್ ಲಾಟಿ ಅವರು, ವಿದ್ಯಾರ್ಥಿ ದೆಸೆಯಲ್ಲಿ ಕರಿವೀರಪ್ಪ ಅವರು ತೋರುತ್ತಿದ್ದ ನಿಸ್ವಾರ್ಥ ಸೇವಾ ಮನೋಭಾವ ಹಾಗೂ ಸ್ನೇಹಿತರಿಗಾಗಿ ಸ್ಪಂದಿಸುತ್ತಿದ್ದ ಗುಣವನ್ನು ಸ್ಮರಿಸಿ ಭಾವುಕರಾದರು.
ಈ ಸಂದರ್ಭದಲ್ಲಿ ನಿವೃತ್ತ ನೌಕರರಾದ ಕುಮಾರಸ್ವಾಮಿ, ಶರಣಪ್ಪ ಮೇಟಿ, ಅಂಜನಪ್ಪ, ಪಿಎಸ್ಐ ಪರಮೇಶ್ವರಪ್ಪ ಸೇರಿದಂತೆ ಟಿ.ಬಿ. ಡ್ಯಾಮ್, ಬಳ್ಳಾರಿ, ಕಂಪ್ಲಿ ಮತ್ತು ಗಂಗಾವತಿಯಿಂದ ಆಗಮಿಸಿದ್ದ ಅವರ ಆಪ್ತ ಗೆಳೆಯರು, ಪೊಲೀಸ್ ಸಿಬ್ಬಂದಿ ವರ್ಗದವರು ಪಾಲ್ಗೊಂಡು ಕರಿವೀರಪ್ಪ ಅವರನ್ನು ಸನ್ಮಾನಿಸಿ, ಅವರ ಮುಂದಿನ ನಿವೃತ್ತಿ ಜೀವನ ಸುಖಮಯವಾಗಿರಲಿ ಎಂದು ಹಾರೈಸಿದರು.